Аналитика
Од 1 март, сите електронски плаќања со картички и кредитни трансфери преку интернет-банкарство или мобилни апликации ќе се извршуваат со засилена автентикација, со цел поголема безбедност и заштита на корисниците. За оваа новина информираат од Македонската банкарска асоцијација, при што се нагласува дека секоја банка ќе го примени моделот според своите можности.
„Засилената автентикација ќе се применува кај платежни трансакции иницирани на далечина, и тоа: плаќања со платежни картички при електронска трговија, како и кредитни трансфери иницирани преку интернет-банкарство или мобилни апликации на банките.
Воведувањето на засилената автентикација има за цел подигнување на нивото на безбедност на електронските плаќања, намалување на ризикот од неовластени трансакции и подобра заштита на корисниците на платежни услуги, при што електронските и дигиталните плаќања ќе продолжат да се извршуваат непречено, со дополнителен безбедносен чекор“, посочуваат од МБА.
Засилената автентикација се заснова на користење на најмалку два од следните три меѓусебно независни елементи: елемент на знаење – нешто што го знае корисникот (на пример лозинка или ПИН); елемент на поседување – нешто што го поседува корисникот (на пример мобилен уред, токен или платежна картичка); елемент на својство – нешто што е својствено за корисникот (биометриски податоци, како отпечаток од прст или препознавање лице).
„Во таа насока, досегашните начини на потврда на трансакции, како што се еднократни кодови доставени преку СМС или електронска пошта, кои се користат во рамки на постојните 3-D Secure решенија, ќе бидат заменети или надградени со посовремени и побезбедни механизми, во согласност со барањата на засилената автентикација“, наведуваат од МБА.
Притоа, се појаснува дека секоја банка, согласно законската рамка и сопствените технички и организациски можности, самостојно ќе го дефинира моделот на засилена автентикација, односно комбинацијата на елементи што ќе ги применува, поради што начинот на автентикација и корисничкото искуство може да се разликуваат од банка до банка.
Во рамки на процесот на воведување на засилената автентикација, банките ќе пристапат кон информирање и едукација на своите клиенти за применуваните решенија, постапките за автентикација и практичните чекори при извршување на платежни трансакции, преку сопствените комуникациски канали.
Примената на засилената автентикација на корисниците (Strong Customer Authentication – SCA) при извршување одредени платежни трансакции е согласно Законот за платежни услуги и платни системи, со кој во националното законодавство е транспонирана Директивата (ЕУ) 2015/2366 за платежни услуги на внатрешниот пазар (PSD2).
„Примената на засилената автентикација претставува значаен чекор во усогласувањето на платниот систем со европската регулаторна рамка, придонесувајќи кон зголемена сигурност, доверба и заштита на корисниците при користење на современите електронски платежни услуги.
Македонската банкарска асоцијација, заедно со банките-членки, останува посветена на унапредување на безбедноста и стабилноста на платниот промет, како и на поддршка на процесите на дигитализација и модернизација на платежните услуги“, се вели во соопштението на МБА.
